Go dtí seo, rinne a lán úinéirí pianónna agus daoine a bhfuil grá mór acu don cheol clasaiceach, déileálaithe pianó in Éirinn agus tiúnóirí pianó in áiteanna eile san áireamh, na huirlisí ceoil is fearr a chur ar iontaoibh cheardlann Penguin Pianos chun iad a dheisiú, a sheirbhísiú nó a ollchóiriú. Mar sin leanfaimid ar aghaidh ag cabhrú chomh maith agus is féidir linn i gcónaí lenár gcliaint, cairde ceoil a oibríonn go príobháideach agus in institiúidí.
Rania agus Veit ♫
"Two little birdies taught me"
Olaphictiúr ar Chanbhás le Rania Kuhn (RORO), 2009
Pictiúr Bunaidh 60x80 cm
Noda agus Comhairle do Thuismitheoirí
Bígí dáiríre faoin gceol a sheinneann bhur bpáistí. Ná labhraígí riamh go díspeagúil faoin gceol a sheinneann siad, fiú amháin má bhíonn fuaimeanna uafásacha ag teacht ón bpianó! (Ag an bpointe seo is ríthábhachtach pianó maith atá i dtiúin a bheith acu agus gan rogha a dhéanamh an ceann is saoire a fháil sa sladmhargadh nó sa halla ceantála, ceann a bhfuil boladh as agus le téada a bhfuil meirg orthu). Bíonn páistí an-ghoilliúnach agus is féidir iad a ghortú go dona má thugtar “gliogarnach”, “plabadh”, “tiompáil” nó “cigilt eabhair” ar an gcaoi a seinneann siad an pianó. Is tábhachtach go gcuimhnímid i gcónaí go bhfuil teorainn leis an méid is féidir a dhéanamh leis na nótaí eabhair leo féin; caithfidh na nótaí éabainn a bheith i dteannta leo chun ceol álainn a bheith ann. Is ciapadh bambairneach daoibhse agus do bhur bpáistí mura dtagann fuaim cheart ó na nótaí go léir nó má bhíonn nótaí righin nó greamaitheach nó má bhíonn nótaí nach bhfuil fuaim ar bith astu nuair a sheinntear iad.
Tugaigí spreagadh do bhur bpáistí an pianó a sheinm, fiú amháin nuair nach mbíonn fonn orthu é a dhéanamh. Tugaigí tacaíocht dóibh nuair a bhíonn deacrachtaí acu agus nuair a bhíonn fonn orthu éirí as. Déanaigí iarracht cur ina luí orthu an tábhacht a bhaineann le buanseasmhacht a chothú agus constaicí a shárú. Ag an am céanna is ríthábhachtach gan brú a chur orthu riamh. Seachnaígí ceisteanna mar seo a chur orthu: “An ndearna sibh cleachtadh inniu?" Is fearr ceist mar seo a chur “An gcaithfidh sibh tamaillín ag seinm an pianó inniu?" D’fhéadfadh fochiall dhiúltach a bheith ag baint le téarmaí ar nós “cleachtadh” - samhlaítear go mbíonn obair chrua, sclábhaíocht agus cruatan i gceist. Go cinnte beidh orthu codanna áirithe de phíosa ceoil a “chleachtadh” ionas go mbeidh siad in ann iad a sheinm níos fearr, ach d’fhéadfadh éifeacht dhiúltach shíceolaíoch a bheith ann má dhéantar an focal “cleachtadh” agus seinm pianó a chomhcheangal i gcónaí .
Caithigí am ag éisteacht le bhur bpáistí. Tugaigí spreagadh dóibh a bhfuil á fhoghlaim acu a sheinm daoibh, ach ná cuirigí faoi bhrú iad é sin a dhéanamh. Molaigí iad go haer, ach toisc go bhfuil tuiscint mhaith ag páistí ar an bhfírinne, bíodh réalachas agus macántacht ag gabháil leis an moladh. Bíonn a fhios ag na páistí féin cad iad na laigí a bhíonn acu. Bígí cúramach breithiúnas a thabhairt ar an gcaoi a seinneann siad agus thar aon rud eile seachnaígí comparáid a dhéanamh idir iad agus a gcairde nó a siblíní.